作為一間關顧學生學習狀況嘅琴行，我們希望學生落堂之後喺屋企有一定嘅支援。
所以呢個就係我哋音樂總監及校長要寫咁多網誌分享嘅原因。
上次提及過學習樂曲嘅時候，要控制眼球嘅動向，今日我哋希望講一講演奏樂器同埋聆聽嘅關係。
透過樂器發出美好嘅聲音，係其中一個好重要嘅學習目標，就好似我哋係嬰兒時期，要花費時間學識講清楚每一隻字咁樣。 美好嘅聲音使人心情愉悅， 所以喺學習音樂同埋樂器嘅途中，耳仔嘅角色係好重要的。 因為佢負責聆聽自己produce嘅聲音， 之後再透過思考去改善 。
那麼，如何辨別美好動聽的聲音呢？身處喺互聯網時代，我們可以直接喺YouTube度打個歌名，等小朋友喺屋企可以聽多啲唔同嘅版本。當然我哋可以多對比幾個，搵一個自己鍾意/更加好聽嘅版本嚟學習，嘗試係返自己樂器模仿同模擬聽到美好嘅聲音。
其實聆聽本身呢個動作，就係一個反思(evaluation) 嘅動作，手指觸碰琴鍵，或者係手臂帶動琴弓拉過弦線，呢個係執行；執行完之後一定要有evaluation, 咁樣先可以透過不斷嘅反思完而得以有進步。
練習的時候一邊聆聽，小朋友會有反思嘅機會，例如問自己：我覺得啱啱嘅音色點樣？我拉得準唔準？有冇嘢我可以做好啲？
呢啲透過聆聽， 自己問返自己嘅問題， 係一個反思能力嘅呈現 ，將來亦都可以應用喺生活當中， 例如係，喺每做一件事之前之後， 都會自己反省，自我檢討等等， 係好寶貴的quality。
希望各位家長同埋小朋友都可以花點時間理解以上的分享，再應用喺樂器及生活上！
Comments